Blóðgjafafélag Íslands BGFÍ

The Blood Donors Society of Iceland


BGFÍ

Nafn:

BGFÍ Blóðgjafafélag Íslands

Farsími:

8930733

Afmælisdagur:

16. júlí 1981

Heimilisfang:

Snorrabraut 60, 101 Reykjavík

Kennitala:

700781-0389

Bankanúmer:

512-14-100900

Blóðgjafar á Facebook

Blóðgjafar geta nú merkt prófíl mynd sína á Facebook með merki Blóðgjafafélags Íslands með því að smella á merkið hér að neðan



Tenglar

20000301 BH Örugg blóðgjöf hefst hjá mér

Örugg blóðgjöf hefst hjá mér - ár öruggs blóðs

ALÞJÓÐA heilbrigðismálastofnunin (WHO) vill helga árið 2000 upphafi þess að koma öllum í skilning um mikilvægi öruggs blóðs og að hvetja þjóðir heims til að koma á kerfi sem tryggir aðgang að nægum og öruggum blóðbirgðum. Þema dags Alþjóða heilbrigðismálastofnunarinnar 7. apríl verður öruggt blóð og slagorð dagsins "safe blood starts with me" mætti þýða sem "örugg blóðgjöf hefst hjá mér".

Gefum þeim Gro Harlem Brundtland, framkvæmdastjóra Alþjóða heilbrigðismálastofnunarinnar, og George Weber, ritara alþjóðasambands Rauða krossins og Rauða hálfmánans orðið:

"Um allan heim hefur fólk af göfuglyndi gefið blóð svo bjarga megi lífi annarra. Við þökkum öllum blóðgjöfum fyrir hönd þeirra milljóna sjúklinga sem bjargað hefur verið fyrir tilstilli blóðgjafar. Óviðjafnanleg gjöf frá einum einstaklingi til annars, þar sem blóðgjafinn fær varla nokkurn tímann þakkir fyrir. Við vottum sérstaka virðingu okkar þeim blóðgjöfum sem gefa reglulega blóð sitt af fúsum og frjálsum vilja og þiggja ekki greiðslu fyrir. Þannig stuðla þeir að viðvarandi framboði á öruggu blóði.

Við biðjum þig að íhuga slagorð dags Alþjóða heilbrigðismálastofnunarinnar í ár, "safe blood starts with me". Alþjóða samfélagið á sér sameiginlega uppsprettu lífs; blóð. Þörfin fyrir blóðgjafa sem gefa af fúsum og frjálsum vilja er viðvarandi - blóð er notað allan sólarhringinn allt árið um kring." (Lausleg þýðing undirritaðs)

Við Íslendingar erum svo lánsamir að eiga blóðgjafa að sem eru meðal öruggustu blóðgjafa í heimi. Við þurfum hins vegar á fleiri blóðgjöfum að halda. Blóðgjafar eru ekki sjálfkrafa uppspretta sem sækja má endalaust í. Þetta þurfa yfirvöld heilbrigðismála að gera sér grein fyrir. Öll markaðssókn, hvort sem um nýjar tryggingar eða nýtt símafyrirtæki er að ræða eða öflun nýrra blóðgjafa, kostar sitt. Heilbrigðisyfirvöld verða að styðja með myndarlegum hætti við þá sem vinna að öflun nýrra blóðgjafa og viðhaldi reglulegra blóðgjafa.

Við munum öll eftir ári aldraðra í fyrra. Þá helgaði Alþjóða heilbrigðismálastofnunin árið 1999 málefnum aldraðra. Haldin var ráðstefna í nýja tónlistarhúsinu í Kópavogi, margar ræður haldnar og settir á laggirnar starfshópar.

Hér er gullið tækifæri fyrir yfirvöld heilbrigðismála til að koma fram og láta í ljós þakklæti til þeirra fjölmörgu blóðgjafa og annarra sem styðja blóðgjafa- og blóðbankaþjónustu í landinu.

Blóðgjafafélag Íslands gekk árið 1998 í alþjóða blóðgjafasamtökin IFBDO (International Federation of Blood Donor Organizations). Meðal markmiða IFBDO eru sjálfbæri (self-sufficiency) hvað varðar blóð og afurðir þess, frá sjálfboðaliðum sem þiggja ekki greiðslu fyrir (nonpaid voluntary donors) og að stuðla að auknu trausti almennings á blóðframboði þjóða með því að samstilla öryggisstaðla og eftirlit með blóðgjöfum.

Í Blóðbankanum í Reykjavík liggur frammi efni um starfsemi Blóðgjafafélags Íslands, vilji menn kynna sér það. Þriðjudaginn 29. febrúar verður haldinn aðalfundur félagsins þar sem m.a. hetjublóðgjöfum verða veittar viðurkenningar og flutt verða erindi tengd blóðgjöfum. Fundurinn er öllum opinn og hefst kl. 20.00 í anddyri K-byggingar Landspítalans.

BJÖRN HARÐARSON,

formaður Blóðgjafafélags Íslands.