stofnað 16. júlí 1981
Blóðgjafafélag Íslands er félagsskapur allra blóðgjafa og annarra einstaklinga sem hafa áhuga á málefnum sem félagið lætur sig varða. Tilgangur félagsins er að fræða blóðgjafa, almenning og stjórnvöld um mikilvægi blóðs til lækninga. Einnig að fræða um blóðsöfnun, blóðbankastarfsemi og notkun blóðs á sjúkrahúsum hérlendis og erlendis.
Stofnfundur Blóðgjafafélags Íslands var haldinn 16. júlí 1981. Til þessa fundar voru boðnir velkomnir allir blóðgjafar og aðrir sem vildu styrkja blóðsöfnunarstörf og blóðbankastarfsemi í lækninga- og rannsóknaskyni. Ólafur Jensson þáverandi forstöðumaður Blóðbankans (frá 1. mars 1972 til loka árs 1994) var drifkrafturinn í stofnun félagsins og gegndi formennsku þess frá stofnun og til 1993. Með stofnun Blóðgjafafélags Íslands vildi Ólafur efla fræðslu til blóðgjafa, almennings og stjórnvalda um mikilvægi blóðs til lækninga. Árið 2003 var ákveðið að fara að lögum og þeir blóðgjafar sem áhuga höfðu á að ganga í félagið yrðu að skrá sig í það formlega en fram til þessa höfðu allir blóðgjafar verið taldir félagar í blóðgjafafélaginu. Stjórn Blóðgjafafélagsins samanstendur af sjö stjórnarmönnum og er núverandi formaður þess Davíð Stefán Guðmundsson.
Blóðgjafafélagið tók fljótt yfir rekstur sjóðs sem áður var í höndum vísinda og tækjasjóðs Blóðbankans en í hann runnu tekjur af útflutningi plasma úr blóði sem ekki var lengur nýtilegt til lækninga. Þessi útflutningur lagðist af árið 1985 og hefur félagið verið tekjulaust síðan. Má því með sanni segja að félagið lifi á gömlum merg. Í seinni tíma hefur Blóðgjafafélag Íslands beint kröftum sínum að kynningu á félaginu og starfsemi þess. Kynning þessi hefur m.a. falist í að fræða heilbrigðisyfirvöld um þýðingu þess að halda úti starfsemi Blóðgjafafélagsins sem hagsmunaaðila fyrir blóðgjafa á Íslandi.
Blóðgjafafélagið stóð fyrir gerð fræðslumyndbands árið 1997 um blóðgjafir og notkun blóðs á íslandi. Árið 1998 gekk Blóðgjafafélagið í Alþjóða blóðgjafasamtökin IFBDO (International Federation of Blood Donor Organizations). Meðal markmiða IFBDO eru sjálfbærni (e.self – sufficiency) hvað varðar blóð frá sjálfboðaliðum sem þiggja ekki greiðslu fyrir (e. non-paid voluntary donors) og að stuðla að auknu trausti almennings á blóðframboði þjóða með því að samstilla öryggisstaðla og eftirlit með blóðgjöfum.
Á tímum reglugerða og lagaákvæða frá Evrópubandalaginu eiga samtök eins og Blóðgjafafélag Íslands erindi við almenning og stjórnvöld. Til þess að anna eftirspurn eftir blóðhlutum þarf 15 – 16 þúsund blóðgjafir á ári í Blóðbankanum. Það eru 8000 – 9000 blóðgjafar sem standa undir þessari blóðgjöf. Blóðgjafahópurinn er að eldast. Nýliðun, þótt nokkur sé, er ekki næg og er því unnið að krafti að öflun nýrra blóðgjafa. Góður blóðgjafahópur er ein af undirstöðum íslenska heilbrigðiskerfisins eins og við þekkjum það í dag.