Blóðgjafafélag Íslands BGFÍ

The Blood Donors Society of Iceland


BGFÍ

Nafn:

BGFÍ Blóðgjafafélag Íslands

Farsími:

8930733

Afmælisdagur:

16. júlí 1981

Heimilisfang:

Snorrabraut 60, 101 Reykjavík

Kennitala:

700781-0389

Bankanúmer:

512-14-100900

Blóðgjafar á Facebook

Blóðgjafar geta nú merkt prófíl mynd sína á Facebook með merki Blóðgjafafélags Íslands með því að smella á merkið hér að neðan



Tenglar

19980805 BH Neyðarkall til blóðgjafa

Neyðarkall til blóðgjafa

Frá Birni Harðarsyni:

EINS OG við munum kom nýverið neyðarkall frá Blóðbankanum þar sem óskað var eftir blóðgjöfum strax vegna bágrar lagerstöðu blóðhluta. Þá sem fyrr brugðust blóðgjafar ekki skyldu sinni og kom mikill fjöldi þeirra í Blóðbankann þann dag og næstu daga. Blóðgjafar sýndu enn og aftur að þeim rennur blóðið til skyldunnar, þeir vita hvert þeirra hlutverk er í nútíma heilbrigðisþjónustu, þeim stendur ekki á sama. Blóðgjafar stóðu um alla ganga og biðu, því á slíkum álagstímum er óhjákvæmilegt að nokkur bið skapast. Þetta skilja blóðgjafar og þeir biðu rólegir, svo rólegir að aðdáun vakti. Blóðgjafar stóðu sig, þeir gerðu sitt og það er gott til þess að vita. Takk, kæru blóðgjafar.

Í Blóðbankann koma árlega yfir 16 þúsund manns að gefa blóð. Blóðgjafar þiggja kaffi og með því fyrir viðvikið. Þar er einnig fylgst með þeim í 10 til 15 mínútur eftir blóðgjöfina. Kaffistofa blóðgjafa er í 16 fermetra herbergi svo óhætt er að segja þar sé fermetrinn vel nýttur. Skyldu vera til staðlar yfir það rými sem hverjum gesti sé ætlað á veitinga og kaffihúsum?

Hvað gera heilbrigðisyfirvöld fyrir okkur blóðgjafa? Gera heilbrigðisyfirvöld sér grein fyrir því mikilvæga framlagi sem við blóðgjafar leggja til heilbrigðiskerfis okkar? Hvernig er búið að blóðgjöfum á Íslandi? Hvernig er aðstaða blóðgjafa í Blóðbankanum? Það vitum við blóðgjafar mæta vel.

Húsnæði Blóðbankans efst á Landspítalalóðinni er það sama og Blóðbankinn var stofnsettur í árið 1943, fyrir 45 árum. Starfsemin og kröfur til hennar hafa margfaldast á þeim tíma. Fjöldi blóðgjafa hefur margfaldast en aðstaða fyrir þá hefur í langan tíma verið mjög þröng. Þegar starfsemin margfaldast er eðlilegt að gengið sé á það pláss sem fyrir er ef ekki kemur til stækkun. Þannig hefur í gegnum árin verið þrengt að starfseminni bæði hvað varðar aðstöðu starfsfólks og ekki síður aðstöðu blóðgjafa. Við eigum að miða aðstöðuna við það sem venjulega gengur og gerist og gera það vel. Í dag er aðstaða blóðgjafa ekki sú sem hún þarf að vera miðað við venjulega starfsemi. Álagstoppar koma, hafa komið áður og munu koma aftur. Þeir koma á hverjum degi, í hverri viku og á hverju ári, bara mismunandi stórir. Núverandi aðstaða í Blóðbankanum býður ekki upp á nægilegt rými til að halda uppi fræðslu og upplýsingagjöf til blóðgjafa eins og þörf er á. Blóðgjafafélag Íslands er aðili að alþjóða blóðgjafasamtökunum. Við viljum miða okkur við það sem vel er gert erlendis, nóg eru viðmiðin. Við förum fram á að okkur verði sköpuð betri aðstaða í Blóðbankanum svo við getum haldið áfram að koma þangað, liðið vel og gefið blóð, því við vitum hve mikilvægir við blóðgjafar erum. Tökum nú höndum saman og sköpum þessari mikilvægu stofnun betri aðstöðu og bætum úr brýnni húsnæðisþörf hennar í þágu okkar allra.

BJÖRN HARÐARSON,

formaður Blóðgjafafélags Íslands.